Туркия президенти Ражаб Тоййиб Эрдўғон Бирлашган Миллатлар Ташкилоти Бош ассамблеясидаги чиқишида Исроилнинг фаластинликларга «зулми»ни танқид қилди. Бу ҳақда «The Times of Israel» хабар берди.

Маълум бўлишича, президент Қуддусдаги вазият ҳақида гапирган. Шунингдек, Туркия раҳбари тинчлик музокараларини қайта бошлашни таклиф қилган. 

«Фаластинлик биродарларимизга қарши Исроил зулми давом этар экан, Яқин Шарқда тинчлик ва барқарорлик бўлиши мумкин эмас. Тинчлик жараёнини қайта бошлаш зарур. Ишғол қилиш, ерларни қўшиб олиш ва ноқонуний аҳоли пунктлари сиёсатини тезроқ тўхтатиш керак», — деган Эрдўғон. Туркия раҳбари, шунингдек, Исроилнинг Қуддуснинг халқаро мақомини бузишини қоралаган.