Австралия, Ҳиндистон, АҚШ ва Япония раҳбарлари хавфсизлик ва илм-фан соҳасидаги ҳамкорликни ривожлантириш, сунъий йўлдош маълумотларини алмашиш ҳамда Афғонистонга нисбатан сиёсатни мувофиқлаштиришга келишиб олдилар. Бу Хавфсизлик бўйича тўрт томонлама мулоқотда иштирок этаётган давлатлар раҳбарларининг биринчи юзма-юз учрашуви саналади. Сиёсатшунослар Канберра, Нью-Деҳли ва Токио билан иттифоқ Вашингтон учун стратегик аҳамиятга эга эканлигини таъкидламоқда. Чунки, бу тузилма Хитойни тийиб туриш учун шароит яратади.

АҚШ президенти Жо Байденнинг сўзларига кўра, келажакка умумий дунёқараш ва нуқтаи назарга эга бўлган шерикликдаги “тўртлик” “давримизнинг асосий муаммоларини ҳал қилиш учун тузилган”. “Биз пандемия, иқлим ва янги технологияларнинг ривожланиши ҳақида гапирмоқдамиз. Бу шериклик мен шу ҳафта бошида БМТида айтган халқаро ҳамкорлик ёндашувини акс эттиради. Олти ой олдин биз Ҳинд-Тинч океани минтақаси эркин ва очиқ бўлиши учун умумий позитив кун тартибини илгари суриш бўйича аниқ мажбуриятларни олдик. Бугун мен фахр билан айтаманки, биз жуда яхши ютуқларга эришдик”, – деди Байден.

Австралия Бош вазири Скотт Моррисон: “Ҳозирги вақтда дунёнинг Ҳинд-Тинч океани минтақасидан кўра фаол қисми йўқ. Алоҳида имкониятларга эга ушбу минтақа, кенг хилма-хиллик, катта бойликни ўзида жамлаган. Лекин бу ерда ҳал қилиниши керак бўлган муаммолар ҳам кўп”.

Ҳиндистон бош вазири Нарендра Моди АҚШ президенти билан музокаралар ўтказди. Бу Жо Байден Оқ уй хўжайини бўлганидан кейин икки давлат раҳбарларининг биринчи шахсий учрашуви эди. Байден ва Моди мудофаа саноати соҳасида икки томонлама ҳамкорликни ривожлантириш ва терроризмга қарши курашда биргаликдаги ишларни чуқурлаштириш тарафдори эканликларини билдиришди.