Дунёда коронавирус билан касалланиш динамикаси кун сайин ўзгармоқда. Баъзи саналарда антирекорд кўрсаткичлари қайд этилаётган бўлса, айрим кунларда сезиларли пасайиш ҳолатлари кузатиляпти. Аммо, барибир мавжуд хавф сақланиб турибди: “омикрон” ҳали ортга чекингани йўқ!

Шу сабабли қатор давлатлар карантин чораларини кучайтиришга мажбур бўляпти. Масалан, Арманистонда пандемиянинг янги тўлқини шароитида янги чекловлар кучга кирди. Ресторан, меҳмонхона, спорт заллари ва бошқа жамоат жойларига ташриф буюрувчилар энди эмланганлик сертификати билан бирга, QR код ёки ПЗР тести салбий натижасини тақдим этишлари шарт.

Австрияга эса кечадан ПЗР тестидан ўтмаган бўлса-да, бустер доза билан эмланган чет элликлар мамлакат ҳудудига киритиладиган бўлди. Бу имкониятдан “омикрон” вируси биринчи марта аниқланган Африка қитъасидаги 14 мамлакат, шунингдек, Европанинг Дания, Нидерландия, Норвегия ва Буюк Британия давлатлари фуқаролари фойдалана олмайди.

Швейцарияда эса 29 январдан бу ерда тан олинган вакциналар билан эмланган ва СOVID-19дан тузалган шахслардан мамлакатга киришда ПЗР тестининг салбий натижасини кўрсатиш талаб этилмайди.

Россияда ҳам сўнгги кунларда касалланиш кўрсаткичлари кескин ошмоқда. Хусусан, 24 январь куни бу ерда 64,5 минг янги ҳолат рўйхатга олинди. Шу туфайли кечадан мамлакатнинг 20 га яқин ҳудудида бир қатор чекловлар, жумладан, масофадан ишлаш ва оммавий тадбирларни бекор қилиш тартиби жорий қилинди.

Францияда душанбадан 16 ёшдан ошган ҳар бир киши эмланиши шарт. Бусиз жамоат транспортига чиқиш ва тамаддихоналарга кириш тақиқланади.

Шундай бир вазиятда Жаҳон соғлиқни сақлаш ташкилоти раҳбари Тедрос Гебрейесус янги баёнот билан чиқди. Унинг сўзларига кўра, “омикрон” охирги штамм бўлишига ишонмаслик керак.

“Ўтган ҳафтада ўртача ҳар уч сонияда 100 та янги касалланиш ҳолат қайд этилди, — деди ЖССТ бош директори. — Шунингдек, ҳар 12 сонияда бир киши COVID-19дан вафот этган”.

Т.Гебрейесуснинг таъкидлашича, ўлим кўрсаткичи, Африканинг “омикрон” қайд этилган барча минтақалари, хусусан, коронавирусга қарши вакциналардан фойдаланиш имконияти паст бўлган ҳудудларда, айниқса, юқори.

Шунингдек, россиялик генетик олим Андрей Исаев “омикрон” штамми организмга кўз орқали кириши мумкин, деган хулосасини эълон қилди. Бундай ҳолатдан сўнг, беморда бош оғриғи ва бурун оқиши белгилари намоён бўлади.