«Манчестер Сити» бош мураббийи Пеп Гвардиола Чемпионлар лигаси 1/8 финали доирасидаги «Реал»га қарши ўйин олдидан Мадрид клуби ҳақида фикр билдирди.

«Бу клуб доимо мени лол қолдирган. «Реал» сафидаги футболчилар Чемпионлар лигаси финалида шу даража кўп марта иштирок этишган-ки, уларнинг бош совринни неча марта қўлга киритганликларини ҳатто билмайман. 

«Сити»да эса нуфузли турнир ғолиблигини қўлга киритган футболчилар кўп эмас. Клаудио Браво яна қайсидир футболчилар бўлиши мумкин. Шунга қарамай, Чемпионлар лигасида ғолиб чиқиш иштиёқини ҳис қилишимиз керак.

«Реал»га қарши учрашув биз учун ҳақиқий синов. Мадрид клуби билан баҳсда 180 дақиқа давомида ўз ўйинимизни кўрсатишимиз, курашишимиз шарт.

«Реал» – бу биз ўсмоқчи бўлган даража, улар забт этган чўққиларга биз ҳам чиқишни истаймиз. Мадриддаги ўйиндан кейин «ким эканлигимизни кўрсатдик», дейишни истардим. Жаҳондаги энг катта ва энг чиройли ареналардан бирида ўз кучимизни кўрсатиб, голлар уришга интиламиз. Мадридда энг яхши ўйинимизни кўрсатишимиз керак. Ҳар ҳолда биз Чемпионлар лигасини 13 марта қўлга киритган бу турнирнинг қироли бўлган клубга қарши тўп сурамиз» – дея Гвардиоланинг сўзларидан иқтибос келтирмоқда Goal.com.

Маълумот учун, «Реал» – «Манчестер Сити» учрашуви 26 февраль куни Мадридда ўтказилади. Баҳс Тошкент вақти билан соат 01:00да бошланади.