Муҳтожларни қўллаб-қувватлаш, ночорларга, кексаларга меҳр-оқибат, саховат кўрсатиш халқимизнинг азалий қадриятларидан. Бу эзгу фазилатлар қон-қонимизга сингиб кетган. Айниқса, бугунги таҳликали кунларда ана шу ўлмас қадриятларимиз яна бир бор синовдан ўтмоқда. Давлатимиз раҳбари ташаббуси билан бутун миллатимиз “Саховат ва кўмак” умумхалқ ҳаракати атрофида жипслашмоқда. Бу халқимизнинг бирлиги, ҳамжиҳатлигининг амалий намунаси бўлмоқда.

Бугун Термиз шаҳрида истиқомат қилувчи ижтимоий ҳимояга муҳтож, кўп фарзандли, ногиронлиги бўлган, ўз даромадини йўқотган, коронавирус пандемияси ва карантин даврида вақтинча ишсиз бўлиб қолган оилаларнинг 10 тасини моддий қўллаб-қувватлаш мақсадида Сурхондарё вилояти ҳокимлиги томонидан “Маҳалла” жамоат фонди қошида ташкил этилган “Саховат ва кўмак” жамғармаси ҳисобидан бир бошдан қорамол тарқатилди. Бу эса ушбу муҳтож оила аёлларининг эндиликда уйда ишлаши учун имконият яратилиб, банд бўлишларига имконият берди.