Президентимиз ташаббуси билан соғлиқни сақлаш тизимининг моддий техник базасини мустаҳкамлаш, янги ихтисослаштирилган тиббиёт муассасалари ва бошқа объектларни мавжуд вазият тақозосидан келиб чиққан ҳолда зудлик билан қуриш бўйича олиб борилаётган ишлар вилоятда ҳам ўзининг амалий натижаларини бермоқда.

Жумладан, Термиз туманининг Қорахон маҳалласида бошланган 1000 кишини қабул қилишга мўлжалланган карантин зонаси ҳамда 100 ўринли махсус шифохона қурилиши жадал суръатларда олиб борилмоқда.

Ҳозирда махсус жиҳозланган контейнерлардан иборат карантин зонаси фойдаланишга тайёр ҳолга келтирилди. Якунланиш арафасида турган шифохона эса енгил конструкциялар асосида барпо этилмоқда.

Умумий майдони 15 гектарни ташкил қиладиган ушбу комплексда шифокорларга алоҳида хона, жарроҳлик, жонлантириш бўлимлари, муолажа хоналари, тиббиёт бўлимларидан ташқари карантин ҳудудига келтириладиганлардан шу ернинг ўзида таҳлил олиш учун лаборатория, дорихона, ошхона, кир ювиш бўлими, утилизация бўйича алоҳида жой ҳам қурилмоқда.

Вентиляция, тиббий кислород етказиб бериш, коммуникация тизимлари замонавий тарзда жиҳозланади. Қурилиш майдонига электр энергияси, газ, сув тармоқлари тортиш бўйича ҳам ишлар юқори суръатда ташкил этилган.

Карантин ҳудудини яратишда барча санитар гигиеник нормалар ҳисобга олинган. Махсус шифохона комплексининг пойдевор ишлари якунланиб, енгил конструкциялар асосида бино деворлари ҳам битказилди. Қурилиш ишлари 2 сменада ташкил қилинган бўлиб, 200 нафарга яқин қурувчи меҳнат қилмоқда. Айни кунда хоналар таъмири ҳам параллел равишда олиб борилмоқда.