Бутун умрини Журналистикага, Газета ва Оммавий Ахборот Воситаларига бағишлаган устоз журналист Бахтиёр Эркабоевич Кенжабоев 76 ёшида вафот этди. Устоз журналист Бахтиёр Кенжабоев 1944 йилда Термиз туманининг «Намуна» жамо хўжалигида туғилган. Тошкент Давлат Университетининг журналистика факультетини тамомлаб, Сурхондарё вилояти газеталарида фаолият бошлаган.Узоқ йиллар «Ленин байроғи» ҳозирги «Сурхон тонги» газетасида самарали фаолият юритган. Шундан сўнг журналист Бахтиёр Кенжабоев  Республика нашри «Қишлоқ ҳаёти» газетасининг ўз мухбири вазифасига тайинланади. Устоз Бахтиёр Кенжабоев бу отахон газетада ҳам узоқ йиллар самарали хизмат қилган. Бир неча йил Сурхондарё вилоят ҳокимлигида ҳам масъул соҳаларда ишлади. Узоқ йиллар, то нафақага чиққунигача Сурхондарё вилоят телерадиокомпаниясининг раиси лавозимида фаолият юритди. Телевидение соҳасига раҳбар бўлган журналист, ёш журналистларга чинакам устозлик қилиб, катта мактаб яратди. У кишидаги ғамхўрлик, меҳр-оқибат биз ёшлар учун доимо ибрат мактаби бўлди десак муболаға қилмаган бўламиз. Сурхондарё вилоят телерадиокомпаниясининг ҳудудий яхлитлиги ва ободонлаштирилишининг бош ташкилотчиларидан бўлиб, энг аввало, ичимлик суви ва суғориш тармоқларини йўлга қўйди. Телевидение ҳовлиси кўкаламзорлаштирилиб обод гўшага айланди. Устоз ўз фаолиятлари даврида телерадиокомпания ходимларининг жонкуяр раҳбари ва ҳурматли отахонига айланди. Бахтиёр Эркабоевич Кенжабоевнинг оила аъзолари ва яқинларига чуқур ҳамдардлик бидирамиз. Устознинг порлоқ хотираси қалбларимизда ҳамиша барҳаётдир.