Ўзбекистон Молия вазирлиги қарзга олинган пуллар нимага сарфланаётгани тўғрисидаги маълумотни очиқлади.

Маълум қилинишича, Ўзбекистон номидан ва унинг кафолати остида жалб қилинган қарз қолдиғи 2020-йил 1-июл ҳолатига дастлабки ҳисоб-китобларга кўра 19,4 миллиард доллар эквивалентини ёки ялпи ички маҳсулотга (ЯИМ) нисбатан 34,0 фоизни ташкил этди.

Хусусан, 2020-йилнинг биринчи ярим йиллигида давлат ташқи қарзи 1,6 миллиард долларга ёки йил бошига нисбатан 10,5 фоизга ошиб, 2020-йилнинг 1-июл ҳолатига 17,31 миллиард долларга ёки ЯИМга нисбатан 30,3 фоизга етди.

Қайд этилишича, 2020-йил январ—июн ойларида имзоланган давлат ташқи қарзи битимлари қуйидагиларга йўналтирилади:

Жаҳон банкидан 100 миллион доллар “Обод қишлоқ” лойиҳасига;
Нефт экспорт қилувчи мамлакатлар уюшмаси (ОПЕК)дан 53,4 миллион доллар Наманган шаҳри, Наманган вилоятининг Заркент ва Хўжакент туманларининг сув таъминоти ва оқава сув тизимларини модернизациялаш лойиҳасига;
Жаҳон банкидан 200 миллион доллар Иқтисодий ислоҳотлар дастурини қўллаб-қувватлашни қўшимча молиялаштиришга (ДПО 2);
Халқаро валюта жамғармасидан 125 миллион доллар ва 250 миллион доллар иқтисодиётни қўллаб-қувватлашга;
Осиё инфратузилмавий инвестициялар банкидан 82 миллион доллар “Обод қишлоқ” лойиҳасига.

2020-йил январ—июн ойларида берилган давлат кафолатлари:
Россия ташқи иқтисодий фаолият банкидан 28,3 миллион евро Тўпаланг ГEСни модернизация қилишга;
Россия ташқи иқтисодий фаолият банкидан 38,8 миллион евро Қуйи Чотқол ГEС қурилишига;
Россия ташқи иқтисодий фаолият банкидан 34,2 миллион евро Дарғом каналида Боғишамол 2-кичик ГEС қурилишига;
Хитой давлат тараққиёти банкидан 309,0 миллион доллар “Ўзбекистон ҳаво йўллари” миллий авиакомпанияси учун “Боеинг 787-8” русумидаги 3 та самолётларни сотиб олишга.

Аввалроқ Ўзбекистон давлат бюджети биринчи ярим йилликда 58,2 трилион сўмни ташкил этгани хабар қилинганди.