28 июль, чоршанба куни Олимпиада-2020 бокс турнири 1/16 финалида ўзбекистонлик боксчи Миразиз Мирзахалилов ирландиялик Энтони Уокерга мағлубиятга учраб, мусобақани тарк этганди. 

Ушбу жангдаги рефериларнинг қарорлари ўзбекистонлик мухлис ва мутахассисларнинг эътирозига сабаб бўлганди. Уч раундлик жанг якунида украиналик ҳакам ўзбекистонлик боксчининг ғалабасини қайд этган бўлса, Шри-Ланка, Куба, АҚШ ва угандалик ҳакам ирланд боксчиси ғалабасини қайд этганди – 1:4.

«Спорт» телеканали бош директори Зоҳид Каримовнинг Олимпиада кундалиги кўрсатувида маълум қилишича, Миразиз Мирзахалиловнинг мағлубиятини қайд этган АҚШлик ҳакам Беу Камбэллнинг жангдаги очколари ўрганилиб, бокс рефериси Олимпиададан четлатилган. Ҳакамнинг қарори тўғри ёки нотўғри бўлгани айтилмаган бўлса-да, Камбэллнинг турнирдаги фаолияти тўхтатилган.

Эслатиб ўтамиз, америкалик рефери уч раунд якунига кўра, 28:29 ҳисобида ўзбекистонлик боксчи мағлубиятини қайд этганди.