Индонезиянинг Ява оролида Мерапи вулқони отила бошлади, деб хабар бермоқда Ассосиатед Пресс.

8-август, якшанба куни эрталаб вулқон кратеридан улкан кул тутуни тепага кўтарилиб, бир неча аҳоли пунктларига ёғилган. Камида етти марта вулқондан лава отилиши кузатилган.

Ҳукумат вулқондан 5 км радиусда яшайдиган аҳолидан ўз уйларини тарк этишни сўради. Ҳозирча табиий офатдан жабрланганлар ҳақида маълумот йўқ.

Таъкидланишича, Мерапи вулқонинг кучли отилиши сўнгги марта 2010-йилда кузатилган. Ўшанда 347 киши ҳалок бўлган.

Мерапи — Индонезиядаги энг фаол уйғоқ вулқон. У Марказий Ява провинсиясида, Жокякарта шаҳридан 30 км узоқликда жойлашган. Унинг баландлиги 2910 метрга тенг.

Эслатиб ўтамиз, июл охирида Индонезиянинг Суматра оролидаги Синабунг вулқони фаоллашган, тутун устуни 4,5 километр баландликкача кўтарилиб, яқин ҳудудларда жойлашган шаҳарларни вулқон кули қоплаб олган эди.

Шунингдек, май ойида Конго Демократик Республикаси шарқида жойлашган Нирагонго вулқони отилиши оқибатида 15 киши ҳалок бўлганди.