Америкалик тадбиркор ва ихтирочи Илон Маск ўзига тегишли бўлган “Тесла” компанияси антропоморфик  робот яратиш устида ишлаётганини маълум қилди. Илон бу ҳақида “Сунъий интеллект” кунига бағишланган конференсия вақтида айтиб ўтган.

“Тесла Бот” деб ном олган робот одамлар вақт сарфлашни истамайдиган “зерикарли ва одатий ишлар”ни бажариш билан шуғулланади. У дўконларга харид қилиш учун бориши, 20 килограммгача юк кўтариши мумкин. Маскнинг айтишича, бу орқали келгусида одамларни зерикарли ва оғир жисмоний меҳнатдан халос қилса бўлади.

Роботнинг оғирлиги 56-57 килограмм, бўйи 172-173 сантиметрга тенг. У “Тесла” компаниясининг ҳайдовчисиз бошқариладиган автомобилларини ишлаб чиқариш жараёнида фойдаланиладиган сунъий интеллект ҳамда датчиклар ёрдамида ишлайди.

Роботнинг юз қисми ўрнида монитор бўлади, унда керакли маълумотлар акс этиб туради. “Тесла Бот” соатига 8 километр тэзлик билан ҳаракатлана олади.

Маск “Тесла” компанияси роботлар яратиш бўйича дунёдаги энг йирик ишлаб чиқарувчига айланиб бўлгани, компания машиналари “ярим идрокка эга ғилдиракли робот” эканлигини таъкидлади.

“Тесла Бот”нинг илк прототипи 2022-йилда намойиш этилади.