Яна бир блогер Отабек Аҳлиддинов 7,1 йилга қамалди

Тиббиёт соҳасидаги фаолияти давомида пулларни ноқонуний ўзлаштириш билан айбланиб, судланган блогер Отабек Аҳлиддиновнинг қамоқ муддати Жиноят ишлари бўйича Андижон вилояти суди ҳукми билан 7,1 йилга узайтирилди. Бу ҳақда “Эзгулик” жамияти раиси Абдураҳмон Ташанов маълум қилди.
Унга кўра, Отабек Аҳлиддинов Андижон вилояти Шаҳрихон туманидаги марказий поликлиниканинг бўлим раҳбари лавозимида ишлаган. У 200 миллион сўмдан ортиқ пулни ўзлаштиришда айбланган ва шу йилнинг сентябрида қамоққа олинган.

Дастлаб у жиноят ишлари бўйича Хонобод тумани суди ҳукми билан 5,1 йилга озодликдан маҳрум қилинганди. Сўнг прокуратуранинг протести асосида аппеляция суди ишни қайта кўриб, муддатни 7,1 йилга узайтирди.
У Ўзбекистон Республикаси Жиноят Кодексининг 167-моддаси (Ўзлаштириш ёки растрата йўли билан талон-тарож қилиш) 2-қисмида назарда тутилган жиноятни содир этганликда айбланган. Шунингдек, жамиятга юборилган суд ажрими нусхасида айбланувчига 165-модда билан ҳам жавобгарлик белгиланган.