Сурхондарёда Наврўз умумхалқ байрамига бағишланган асосий тантаналар Термиз туманидаги Отчопар майдони бўлиб ўтди.
Термиз шаҳри, туманлар, йирик корхона ва ташкилотлар, таълим муассасалари учун ажратилган қўрғонлардаги фольклор жамоаларининг чиқишлари, миллий ва халқ ўйинлари, баҳорнинг тансиқ таомлари, ҳунармандчилик буюмлари кўргазмалари намойиши сайил иштирокчиларига ўзига хос байрам шукуҳи улашди.
Байрам саҳнаси узра янграган қўшиқлар, бадиий жамоаларнинг чиқишларида миллий қадриятларимиз, сумалак сайли, баҳор соғинчи ўз ифодасини топди. Наврўз удумлари, анъаналари, кўклам келиши билан боғлиқ одатларимиз саҳна кўринишлари орқали акс эттирилди.
“Ўзбекнаво” гастрол бирлашмаси вилоят бўлими хонанда ва раққосаларининг чиқишлари Ўзбекистон ва Қорақалпоғистон халқ артисти Маҳмуд Намозов, Ўзбекистон ва Қорақалпоғистонда хизмат кўрсатган артист Ҳосила Раҳимова, Ўзбекистонда хизмат кўрсатган артист Дилноза Исмияминова, “Ниҳол” мукофоти совриндорлари Адҳам Солиев, Шоира Отабекова, эстрада хонандаси Рухшонанинг шўх-шодон қўшиқларига уланиб кетди. Уларнинг ижросидаги кўклам ва баҳорни улуғловчи куй-қўшиқлар, сержило рақслар байрам тадбирига ўзгача тароват ва шукуҳ бағишлади.
Наврўз танатаналарида қўшни Афғонистон Ислом Республикаси Балх ва Самангон вилоятлари ҳамда Тожикистон республикаси Хатлон вилояти делегациялар иштирок этди. Меҳмонлар қардош халқлар ўртасида ўзаро борди-келди, дўстлик, қардошлик муносабати мунтазамлик касб этаётганидан мамнуният изҳор этиб, ўзбек халқига бахт-саодат ва фаровонлик тилашди.
Наврўз умумхалқ байрами вилоятнинг шаҳар ва туманлари, маҳалла ва гузарларида, меҳнат жамоалари-ю, ҳар бир хонадонда зўр кўтаринки руҳда нишонланмоқда.