Jinoyatchilikka qarshi kurashish sudlar oldiga qoʻyilgan vazifalardan biridir!

Mamlakatimizda oʻtgan yillar davomida sud-huquq sohasida hayotga tatbiq etilgan keng qamrovli islohotlar natijasida inson huquqlarini himoyalashning samarali mexanizmi shakllantirildi.
Taʼkidlash joizki, bunday keng koʻlamli chora-tadbirlar samarasi inson, uning hayoti, erkinligi, qadr-qimmati va boshqa daxlsiz huquqlari eng oliy qadriyat ekani bugun jamiyatimiz har bir aʼzosining haq-huquqlari, qonuniy manfaatlari taʼminlanayotganida oʻz ifodasini topmoqda.
Sud tizimining bosqichma-bosqich demokratlashtirilishi, inson huquq va erkinliklarini ishonchli himoya qiladigan sud hokimiyatining mustaqilligi toʻgʻrisidagi konstitutsiyaviy tamoyilga qatʼiy rioya etilishi mamlakatda sud-huquq sohasida amalga oshirilayotgan oʻzgarishlar orasida markaziy oʻrinni egallaydi.
Prezidentimiz Sh.Mirziyoyev tomonidan 2016 yil 21 oktyabr kuni qabul qilingan “Sud-huquq tizimini yanada isloh qilish, fuqarolarning huquq va erkinliklarini ishonchli himoya qilish kafolatlarini kuchaytirish chora-tadbirlari toʻgʻrisida”gi PF 4850-sonli Farmoni sud-huquq sohasidagi islohotlarning yangi bosqichini boshlab berdi. Mazkur Farmonga koʻra, sud hokimiyatining chinakam mustaqilligini taʼminlash, fuqarolarning huquq va erkinliklarining ishonchli himoya qilish kafolatlarini kuchaytirish, shuningdek odil sudlovga erishish darajasini oshirish, sud-huquq tizimini yanada isloh qilish sohasida davlat siyosatining asosiy ustuvor yoʻnalishlari etib belgilandi.
Ayni paytda qoʻlga kiritilgan natijalar bilan kifoyalanib qolmasdan, soha rivojiga tanqidiy yondashish, hayotning oʻzi oldimizga qoʻyayotgan bir-biridan muhim va dolzarb vazifalarni samarali hal qilish yoʻllari va mexanizmlari haqida bildirilgan aniq takliflar, amaliy tashabbuslar asosida sud idoralari, sudyalar faoliyatini butunlay yangicha asosda, samarali tashkil etish lozimligiga alohida eʼtibor qaratildi. 
Prezidentimiz Shavkat Mirziyoyev tanqidiy tahlil, qatʼiy tartib-intizom va shaxsiy javobgarlik bugungi kunda davlat boshqaruvi organlarida faoliyat koʻrsatayotgan barcha insonlar qatori sudyalar faoliyatining ham kundalik qoidasi boʻlib qolishi zarurligini alohida taʼkidladi. 
Prezidentimiz tomonidan koʻrsatib oʻtilgan soha rivojiga toʻsiq boʻlib turgan xato-kamchiliklar va muammoli holatlar sudlar oldiga kechiktirib boʻlmas vazifalarni qoʻymoqdaki, shundan kelib chiqqan holda jinoyat ishlari boʻyicha Boysun tuman sudida ish uslubini tubdan oʻzgartirishga erishish borasida bir qator saʼy-harakatlar amalga oshirilib, tegishli chora-tadbirlar dasturi ishlab chiqildi.
Jumladan, huqubuzarliklar profilaktikasi va jinoyatchilikka qarshi kurashish borasida oʻsgan jinoyatchilik tahlil qilinib, sodir etilgan jinoyatchilik boʻyicha hududlarga profilaktika ishlari amalga oshirilib kelinmoqda. 2018 yilga nisbatan Oʻzbekiston Respublikasi JKning 104-moddasi qasddan badanga ogʻir shikast yetkazish, 105-moddasi qasddan badanga oʻrtacha ogʻir shikast yetkazish, 109-moddasi qasddan badanga yengil shikast yetkazish, 110-moddasi qiynash bilan bogʻliq jinoyatlar 2019 yilga kelib ancha oʻsgan. Shu sababli, tuman sudi tomonidan mazkur toifadagi jinoyatlar tahlil qilinib, jinoyatning sabablarini va uning sodir etilishiga imkon bergan shart-sharoitlarni bartaraf etish choralarini koʻrish maqsadida, tegishli fuqarolarning oʻzini oʻzi boshqarish organlariga jami 9 taqdimnoma kiritdi. Hozirda, mazkur fuqarolarning oʻzini oʻzi boshqarish organlari tomonidan tegishli chora-tadbirlar belgilab olinganligi hamda sudlanuvchilarning xulq-atvorini doimiy nazarat qilish boʻyicha murabbiy tayinlanganligi maʼlum qilingan.
Xulosa oʻrnida shuni aytish mumkinki, har bir islohot inson va uning manfaatlari uchun xizmat qilmogʻi lozim. Huquqbuzarliklar profilaktikasi va jinoyatchilikka qarshi kurashish borasida amalga oshirilayotgan samarali ishlar, fuqarolarni qonunlarimizga hurmat ruhida tarbiyalash va sodir etilishi mumkin boʻlgan jinoyatlarning oldini olish maqsadini koʻzlaydi.

Jinoyat ishlari boʻyicha Boysun tuman sudi devonxona mudiri Sh.Qodirov