Surxondaryoda tadbirkorlar bilan bevosita muloqotlar davom etmoqda

Mamlakatimizda tadbirkor va ishbilarmonlar tomonidan amalga oshirilayotgan  koʻplab  istiqbolli  loyihalar ichki bozorni sifatli mahsulotlar bilan toʻldirish, yurtimiz eksport imkoniyatlarini kengaytirishning yangi istiqbollarini ochib bermoqda.

Oʻtgan davr  mobaynida Surxondaryoda ham koʻplab yangi ishlab chiqarish tarmoqlariga asos solinib, sifatli va raqobatbardosh mahsulotlar tayyorlashga erishilmoqda.

Termiz shahrida  faoliyat koʻrsatib kelayotgan «KOMFORT MEBEL SERVIS»  masʼuliyati cheklangan  jamiyati ish boshlaganiga hali koʻp vaqt boʻlgani yoʻq.

Korxonada bankdan olingan  500 ming dollar  kredit evaziga Germaniya, Italiya hamda Xitoy texnologiyasi  asosida  turli  xildagi  mebel mahsulotlari ishlab chiqarish yoʻlga qoʻyildi.

Korxona tomonidan joriy yilning shu davriga qadar  5 mlrd  soʻmlik  mebel mahsulotlari ishlab chiqarilib, isteʼmolchilarga yetkazildi.

Hozirda korxonada ishlab chiqarilayotgan mahsulotlarga ichki bozorda talab juda katta.

Surxondaryo viloyati soliq boshqarmasi xodimlari mazkur korxonada boʻlib, tadbirkorlarga baholash mezonlari, barqarorlik reytingida yuqori koʻrsatkichlarga erishishda soliq majburiyatlarini oʻz vaqtida bajarishning ahamiyati xususida atroflicha maʼlumotlar berishdi.

Maʼlumot uchun aytish kerakki, viloyatda har bir tadbirkorlik subʼektiga korxonabay tizimi asosida soliq xodimi biriktirilgan boʻlib, ular korxonalarning muammolarini hal qilish, ishbilarmonlarga barqarorlik reytingida yuqori koʻrsatkichlarga erishishlariga yaqindan koʻmaklashmoqdalar.

Surxondaryo viloyati soliq boshqarmasi  Matbuot xizmati