Surxondaryo viloyati dehqon bozorlarida narx-navo barqarorligini ta’minlash va oziq-ovqat mahsulotlari tanqisligining oldini olish maqsadida viloyat soliq boshqarmasi hamda Bosh prokuratura huzuridagi Departament rahbarlari hamkorlikda shahar va tumanlardagi dehqon bozorlari faoliyatini o‘rganmoqda.
O‘rganishlar davomida bozorlardagi haqiqiy holat, narx-navo barqarorligi, sanitariya va yong‘in xavfsizligi talablariga rioya etilishi batafsil ko‘rib chiqilmoqda. Aniqlangan kamchiliklar bo‘yicha tegishli choralar ko‘rish, shuningdek, bozorlarda tartib-intizomni yanada kuchaytirish vazifalari belgilanmoqda. Xususan, joriy yilning 14 avgust kuni Sho‘rchi tumanidagi oziq-ovqat dehqon bozorida o‘tkazilgan o‘rganish jarayonida norasmiy savdo rastalari, noqonuniy qurilishlar, sanitariya qoidalariga amal qilinishi, narx-navo barqarorligi, yong‘in xavfsizligi talablari hamda yo‘laklarning ochiq va harakat uchun qulayligi kabi masalalar o‘rganildi. Bozor ma’muriyati rahbari va tuman mutasaddilariga bozor hududida norasmiy rastalar ko‘payib ketgani, bu esa bozor hududining ko‘rkini buzishi ta’kidlandi va ularga qat’iy e’tiroz bildirildi
Shuningdek, bozorda faoliyat yuritayotgan sotuvchilar tomonidan bir martalik yig‘imlar, ijara to‘lovlari va ko‘rsatiladigan xizmatlar uchun to‘lovlarni o‘z vaqtida hamda to‘liq undirilishini ta’minlash maqsadida ushbu bozorda raqamlashtirish ishlarini joriy yilning 1-sentyabriga qadar to‘liq yakunlash yuzasidan topshiriqlar berildi.
Joriy yilning 15 avgust kuni Surxondaryo viloyati soliq boshqarmasi boshlig‘i Erkin Narmanov va Bosh prokuratura huzuridagi Departamentning viloyat boshqarmasi rahbari Shuhrat Zokirov bir necha tuman bozorlari faoliyatini o‘rgandi. O‘rganishlar dastlab Angor tumani markaziy dehqon bozoridan boshlandi. Du yerda sotuvchi va xaridorlar uchun yaratilgan shart-sharoitlar, mahsulotlar narxi va sifati, sanitariya qoidalariga amal qilinishi ko‘zdan kechirildi. Shu bilan birga, arzonlashtirilgan oziq-ovqat va qishloq xo‘jaligi mahsulotlari yarmarkasi ham ko‘zdan kechirildi.
O‘rganishlar davomida mas’ullarga savdo-sotiqdan tushadigan bir martalik yig‘imlar, ijara to‘lovlari va boshqa xizmatlar uchun to‘lovlarni to‘liq va o‘z vaqtida yig‘ish, ushbu mablag‘larni bozor hisob raqamiga to‘liq tushishini ta’minlash bo‘yicha aniq ko‘rsatmalar berildi.
Kunning ikkinchi yarmida o‘rganish ishlar Muzrabot, Sherobod va Boysun tumanlarida davom etdi.Bu tumanlardagi bozorlarda ham narx-navolar, savdo qoidalariga rioya etilishi, nazorat-kassa texnikalari o‘rnatilishi va yashirin iqtisodiyotning oldini olish bo‘yicha amalga oshirilayotgan ishlar obdon o‘rganildi.
Aniqlangan kamchiliklarni bartaraf etish bo‘yicha mas’ullarga tegishli ko‘rsatmalar berildi.
Surxondaryo viloyati soliq boshqarmasi Matbuot xizmati
About the Author
