Inson qadri – ulugʻ, xotirasi – muqaddas

9 may – Xotira va qadrlash kuni hamda Ikkinchi jahon urushida qozonilgan gʻalabaning 75 yilligi Surxondaryo viloyatida ham keng nishonlanmoqda.

Termiz shahridagi Xotira maydoni. Motamsaro ona haykali siymosida dahshatli urushda halok boʻlgan farzandlari haqida oʻylab, nigohini bir nuqtaga qadagancha oʻtirgan mushfiq ona chuqur qaygʻuga botgan boʻlsa-da, ruhiyatida matonat, mustahkam iroda aks etgan. Goʻyo farzandlari hamon tirik…

Bu yerga Surxondaryo viloyati hokimi Toʻra Bobolov, sektorlar rahbarlari, huquqni muhofaza qiluvchi organlar vakillari tashrif buyurishib, maydon uzra taralgan harbiy orkestr sadolari ostida Motamsaro Ona haykali poyiga gulchambarlar qoʻydilar. Vatanimiz tinchligi, xalqimiz osoyishtaligi yoʻlida jon fido qilgan yurtdoshlarimiz yod etildi.

Surxondaryo viloyati hokimi Toʻra Bobolov Termiz shahrida istiqomat qiluvchi Ikkinchi jahon urushi qatnashchilari Midjahid Hodiyev, Sherali Haydarov hamda  Xurram Murtazoyev xonadonida ham boʻlib, Prezidentimizning 9 may umumxalq bayrami – Xotira va qadrlash kuni hamda Ikkinchi jahon urushida qozonilgan gʻalabaning 75 yilligi munosabati bilan ularga yoʻllagan tabriklarini oʻqib eshittirdi.

Davlatimiz rahbarining farmoniga muvofiq 10 million soʻm miqdoridagi pul mukofoti, Prezidentimiz nomidan “Ikkinchi jahon urushidagi gʻalabaning 75 yilligi” esdalik yubiley medali hamda boshqa qimmatbaho sovgʻalarini topshirdi.

“Buyuk Gʻalabani taʼminlashga beqiyos hissa qoʻshgan Sizdek mard, yengilmas va olijanob faxriylarimiz bilan barchamiz haqli ravishda faxrlanamiz, Biz sizlarni faqatgina bayramlarda emas, balki har doim eʼzozlab ardoqlaymiz, sogʻligingiz haqida har kuni, har soatda oʻylaymiz. Sizdek metin irodali qahramonlarimiz borligi xalqimiz, ayniqsa, yoshlarimiz uchun tarixiy haqiqat”, – dedi viloyat hokimi.

Surxondaryo viloyatida hozirda 41 nafar Ikkinchi jahon urushi qatnashchisi, 2 ming 443 nafar front orti mehnat faxriylari, 89 nafar 100 yoshdan oshgan fuqaro istiqomat qiladi. Ular hozirgi dorilomon kunlarda yurtimiz obroʻ-eʼtiborini yanada yuksaltirish va navqiron avlodni Vatanga muhabbat, milliy qadriyatlarimizga hurmat, mustaqillik gʻoyalariga sadoqat ruhida tarbiyalashga oʻz hissalarini qoʻshib kelmoqda.

Termiz shahridagi Saxovat mahallasida yashaydigan Xurram bobo Murtozoyev ham elimiz eʼzozidagi fidoyi faxriylardan biri. Bu yil yuz bilan yuzlashgan otaxon umrining eng kuchga toʻlgan yillari jang maydonlarida jasorat koʻrsatib, dushmanga qarshi kurashdi. Urushdan soʻng uzoq yillar ichki ishlar idoralarida xizmat qilib, xalqimiz osoyishtaligini taʼminladi. Yetti oʻgʻil, toʻrt qizni tarbiyalab, kamolga yetkazdi. Ikkinchi jahon urushidagi jasoratlari hamda urushdan keyingi yillardagi samarali xizmatlari uchun qator orden va medallar bilan taqdirlandi.

–  Soʻnggi yillarda bizga koʻrsatilayotgan gʻamxoʻrliklardan behad minnatdormiz, – deydi Xurram bobo Murtozoyev. – Prezidentimiz yoʻllayotgan bayram tabriklari bizga kuch-quvvat ulashib, yoshimizga yosh qoʻshmoqda. Urushning nomi oʻchsin. Biz boshdan oʻtkazgan ogʻir bu kunlarni avlodlarimiz hech qachon koʻrmasin. Mamlakatimiz tinch, davlatimiz tomonidan amalga oshirilayotgan xayrli ishlar bardavom boʻlaversin.

Ha, shu dorilomon kunlarda Ikkinchi jahon urushida halok boʻlgan minglab yurtdoshlarimiz xotirasini yod etish, urush maydonidan omon qaytgan bobolarimizga, ogʻir kunlarni sabr-bardosh bilan yenggan, mashaqqatli daqiqalarda yurtini, xalqini unutmagan, bir qarich yerini dushmanga ravo koʻrmagan yoshi ulugʻ bu metin irodali qahramonlarimizga hurmat-ehtirom koʻrsatish har bir surxondaryolikka ham gʻurur, ham faxr beradi.

Surxondaryo viloyati hokimligi matbuot xizmati