Сурхондарё вилояти Шеробод туманида 24 октябрь куни «Damas» ҳаракатланиш вақтида бошқарувни йўқотиб, йўл четидаги газ қувурига урилиб, ёниб кетди.

Хабарга кўра, ҳодиса соат 5:40 атрофида Oлмаота–Тошкент–Термиз халқаро автомобиль йўлининг Шеробод тумани Қўрғон маҳалласи ҳудудидан ўтган қисмида кузатилган. Туман фавқулодда вазиятлар бўлимига соат 5:40 да ёнғин ҳақида хабар келиб тушган. Ҳодиса жойига ёнғин қутқарув бўлинмаси 5:45 да етиб бориб, 5:56 да ёнғин ўчирилган. Аммо унгача «Damas»нинг салони ва кузов қисми ёниб кетган.

Дастлабки суриштирувда аниқланишича, туманнинг Қорабоғ маҳалласида яшовчи 1998 йилда туғилган А.М. «Damas» бошқарувини йўқотган. Сўнг машина йўл четидаги газ қувурига урилиб, чақнаш оқибатида ёниб кетган. Қайд этилишича, ҳодисада ҳеч ким жабрланмаган ва вафот этмаган.