Жароҳатидан тикланиб, 9 ойдан сўнг майдонга қайтган «Ливерпуль» ҳимоячиси Виржил ван Дейк «Ҳерта»га (3:4) қарши ўртоқлик баҳсидан сўнг ўз ҳиссиётлари билан ўртоқлашди.

«285 кун аввал футболга қайтиш ҳаракатини бошлагандим. Ҳозир мени чулғаб олган ҳис-туйғуларни етказишим қийин. Лекин шуни айтишим мумкинки, жуда кўп ажойиб инсонларнинг қўллаб-қувватлашига эга бўлганимдан бахтиёрман.

Биринчи кундан бошлаб мен билан бўлган жарроҳ, физиотерапевтлар, мураббийлар ва ходимларга; бошимни туширмаслик учун куч берган жамоадошларимга; севги, қўллаб-қувватлаш ва меҳрибонлик учун мухлисларга; айниқса, оиламга раҳмат.
Иш тўхтамайди. Бу — фақат бошланиши. Давом этамиз!» — деб ёзади нидерландиялик ҳимоячи «твиттер»даги саҳифасида.
Эслатиб ўтамиз, ван Дейк ўтган мавсумда АПЛнинг 5-туридан ўрин олган «Эвертон»га (2:2) қарши баҳсда рақиб посбони Жордан Пикфорд билан тўқнашувда тиззасидан жиддий жароҳат олганди.