Шеробод туманида 2060 та тадбиркорлик субъектлари фаолият юритиб, бу ўтган йилнинг мос даврига нисбатан қарйиб 500 тага кўпроқдир. Албатта, тадбиркорлик субъектлари сонининг ошиб боришида солиқ ходимлари томонидан “Солиқчи-тадбиркорга кўмакчи” тамойили асосида ишларнинг йўлга қўйилиши муҳим аҳамият касб этмоқда. Жумладан жорий йилнинг ўтган даври мобайнида Шеробод туманидаги 677 та хўжалик юритувчи субъектларнинг фаолияти ўрганилиб, кўмаклашиш лозим бўлган 359 та хўжалик юритувчи субъектларнинг муаммоларини ҳал этишда яқиндан ёрдам кўрсатилди.
2021 йилнинг май ойида оилавий корхонамиз фаолиятини йўлга қўйиб, Шеробод туман давлат солиқ инспекцияси ходимларининг ёрдами билан 30 миллион сўм миқдорида имтиёзли кредит олдик, – дейди тадбиркор Ҳасан Бегимқулов. Ушбу маблағга Фарғона вилоятининг Олтиариқ туманидан 35 дона “великан” қуёнларни олиб келиб, ҳозирда уларни кўпайтираяпмиз. Бундан ташқари 20 сотих ер майдонига шакарқамиш экканмиз. Ниятимиз қуёнчиликни кенг ривожлантириш.
Худди шундай, тумандаги яна 6 та хўжалик юритувчи субъектларга 460 миллион сўм миқдорида имтиёзли кредит ажратилди. Бундан ташқари, 207 та тадбиркорлик субъектларига дастлабки бухгалтериясини юритишда, 16 та тадбиркорларга бошқа солиқ турларидан ортиқча тўлов суммасини қайтаришда, 10 та тадбиркорлик субъектларига солиқ имтиёзлари ва уларни қўллаш тартибини тушунтиришда ҳамда 14 нафарига солиқ қарзи тўғрисида маълумот беришда амалий ёрдам кўрсатилди.